Kishte përshtatur lokalin për përdorim droge, arrestohet 39-vjeçari në Durrës, në pranga edhe 2 të tjerë

Policia e Durrësit ka vënë në pranga 3 persona, të akuzuar për drogë. Në pranga ka rënë një 31-vjeçar, për moskallëzim krimi dhe për prododhim dhe shitje droge. Blutë kanë vënë në pranga edhe një 35-vjeçar, po për të njëjtin akuzë. Ndërsa në vijim të këtij aksioni, policia e Durrësit konstatoi se një 39-vjeçar kishte përshtatur lokalin e tij për përdorim droge.

“DVP Durrës/ Shërbimet e Stacionit të Policisë Plazh, në vijim të punës për evidentimin dhe goditjen e paligjshmërisë, kanë konstatuar në lagjen nr.13, Plazh, Durrës, një rast të veprimtarisë kriminale të shpërndarjes së lëndëve narkotike.

Nga specialistët për Hetimin e Narkotikëve në DVP Durrës u arrestua në flagrancë për veprat penale "Moskallëzimi i krimit" dhe "Prodhimi dhe shitja e narkotikëve", shtetasi A. S., 31 vjeç, banues në Durrës, i dënuar më parë për veprën penale "Prodhimi dhe shitja e narkotikëve", si dhe shtetasi E. A., 35 vjeç, banues në Durrës, për veprën penale "Prodhimi dhe shitja e narkotikëve".

Arrestimi i këtyre shtetasve u bë pasi, gjatë kontrollit në banesën e shtetasit A. S., e cila ishte marrë me qira nga shtetasi E. A., shërbimet e Policisë gjetën dhe sekuestruan 700 gramë lëndë narkotike cannabis sativa. Në vijim të veprimeve u arrestua në flagrancë edhe shtetasi Y. Ç., 39 vjeç, banues në Durrës, për veprën penale "Përshtatja e lokalit për përdorim droge", pasi kishte përshtatur lokalin e tij që ndodhej poshtë kësaj banese, për shpërndarjen e lëndës narkotike në doza të vogla”, njofton policia.