Kapet në kufi turisti hungarez që vodhi portofol në Ksamil, iu gjet dhe përforcues metalik grushti në makinë

Policia e Sarandës ka vënë në pranga një shtetas hungarez të shpallur në kërkim për një rast vjedhjeje në Ksamil. Ngjarja ka ndodhur më 28 korrik 2025, kur një turist raportoi vjedhjen e portofolit të tij, në të cilin ndodheshin para dhe karta bankare.

Në vijim të veprimeve hetimore dhe falë bashkëpunimit mes specialistëve për Hetimin e Krimeve në Komisariatin e Policisë Sarandë dhe shërbimeve të Policisë Kufitare në Pikën Kufitare Qafë Botë, u bë e mundur ndalimi i autorit të dyshuar, shtetasit A. S., 36 vjeç, banues në Hungari, teksa po tentonte të largohej nga territori shqiptar me automjetin e tij tip “Volkswagen”.

Gjatë kontrollit në automjet, përveç sendeve personale, policia gjeti dhe një përforcues grushti prej metali, i cili u sekuestrua në cilësinë e provës materiale.

Materialet i janë referuar Prokurorisë për veprime të mëtejshme ligjore.