Borsh/ Arrestohet në flagrancë 29-vjeçari që shkaktoi aksidentin me dy viktima

Një aksident i rëndë me pasojë dy viktima dhe dy të plagosur është regjistruar më 30 korrik 2025 në rrugën e Plazhit, në Borsh. Drejtoria Vendore e Policisë Vlorë ka njoftuar se ka arrestuar në flagrancë drejtuesin e automjetit tip “Benz”, shtetasin M. Q., 29 vjeç, banues në Vlorë, për veprën penale “Shkelja e rregullave të qarkullimit rrugor”.

Nga hetimet paraprake ka rezultuar se i riu ka humbur kontrollin mbi drejtimin e mjetit dhe është përplasur me një furgon që drejtohej nga shtetasi K. M., 66 vjeç. Nga përplasja e fortë, K. M. dhe pasagjerja e tij, D. P., 70 vjeçe, kanë humbur jetën në vendngjarje.

Ndërkohë, vetë drejtuesi M. Q. dhe pasagjeri në automjetin e tij, shtetasi P. A., 23 vjeç, janë transportuar në Qendrën Spitalore Universitare në Tiranë për trajtim mjekësor të specializuar.

Policia vijon hetimet për të dokumentuar plotësisht rrethanat e aksidentit.