FOTO/ Ura e Milotit e dëmtuar, ekspertët nga Tirana kryejnë inspektime në terren. Ja çfarë parashikohet

Ura e Milotit ka dalë jashtë përdorimit për shkak të dëmtimeve serioze në strukturën mbajtëse, duke rrezikuar sigurinë e përdoruesve. Pas inspektimeve të kryera nga ekspertë të Autoritetit Rrugor Shqiptar, zëvendësministri i Infrastrukturës dhe inxhinierë nga Universiteti Politeknik i Tiranës dhe Instituti i Ndërtimit, është konfirmuar nevoja për ndërhyrje emergjente dhe më pas për ndërtimin e një ure të re.

Mbyllja e urës, me gjatësi 788 metra, do të vazhdojë deri në zgjidhjen e plotë të problemit. Dëmtimet janë shkaktuar kryesisht nga erozioni i vazhdueshëm i themeleve dhe shfrytëzimi i paautorizuar i shtratit të lumit Mat për materiale ndërtimi, çka ka krijuar rrezik real shembjeje.

Për të shmangur aksidentet, qarkullimi është devijuar në rrugë alternative, ndërsa autoritetet po punojnë për nisjen e punimeve të para teknike që pritet të fillojnë brenda pak ditësh në bashkëpunim me strukturat akademike dhe inxhinierike.

Në planin afatgjatë, ndërtimi i një ure të re përfshihet në programin kombëtar “100 Ura”, financuar nga Banka Botërore, me qëllim zëvendësimin e infrastrukturës së amortizuar dhe sigurimin e nyjeve kyçe të rrugëve kombëtare.

Kjo ndërhyrje do të përmirësojë sigurinë dhe do të garantojë qarkullimin e pandërprerë në këtë zonë të rëndësishme për transportin dhe ekonominë vendore.