PD kundër rritjes së çmimeve të referencës për pronat, Teliti: Qeveria po rëndon qytetarët, kërkojmë anulimin e menjëhershëm

Partia Demokratike ka reaguar ashpër ndaj vendimit për rritjen e çmimeve të referencës për pasuritë e paluajtshme në vend. Në një deklaratë për mediat, nënkryetari i këshilltarëve bashkiakë të PD në Tiranë, Dorian Teliti, e quajti vendimin të papërgjegjshëm dhe pa asnjë konsultim publik me qytetarët apo grupet e interesit.

Sipas Telitit, rritja e çmimeve të referencës, sidomos në qytete si Durrësi ku ka arritur deri në 2000 euro për metër katror, ka pasoja të drejtpërdrejta në jetën e qytetarëve, duke rritur menjëherë taksën e pronës dhe atë të ndikimit në infrastrukturë.

“Me këtë vendim, qeveria godet qytetarët. Rritet ndjeshëm kostoja për blerjen e një apartamenti dhe, për rrjedhojë, kostoja e jetesës në tërësi,” u shpreh Teliti.

PD kërkon anulimin e menjëhershëm të kësaj mase dhe një reformë të thellë fiskale, të ndershme dhe të konsultuar publikisht, me qëllim lehtësimin e barrës fiskale për familjet dhe bizneset.