Kapet në Korçë 24-vjeçari maroken, tentoi të trafikojë tre emigrantë drejt Greqisë

Një 24-vjeçar me shtetësi marokene, i identifikuar si Omar Chouati, është arrestuar nga Policia e Kufirit në Korçë, pasi u kap në tentativë për të ndihmuar tre emigrantë të paligjshëm të kalonin kufirin nga Shqipëria drejt Greqisë.

Operacioni u zhvillua nga strukturat e Drejtorisë Vendore për Kufirin dhe Migracionin, të cilat ndërhynë në kohë duke ndaluar shtetasin maroken në flagrancë. Bashkë me të, u kapën edhe tre shtetasit që po përpiqeshin të largoheshin ilegalisht nga territori shqiptar.

Policia ka theksuar se ka shtuar kontrollet përgjatë kufirit për të goditur rastet e trafikimit dhe ndihmës për kalim të paligjshëm, një fenomen që shpesh realizohet nga vetë emigrantët e huaj që ndodhen në vend.

Ndaj 24-vjeçarit janë ngritur akuzat për “Ndihmë për kalim të paligjshëm të kufirit”, ndërsa hetimet për rastin vijojnë.