E rëndë në Fier/ Vajza 13-vjeçare abuzohet seksualisht, në kërkim një 30-vjeçar, procedohen penalisht edhe dy të mitur

Një ngjarje e rëndë me përmasa të thella kriminale ka tronditur Fierin. Një vajzë vetëm 13 vjeçe dyshohet të jetë abuzuar seksualisht nga tre persona, mes tyre një 30-vjeçar dhe dy adoleshentë 15-vjeçarë.

Policia e Fierit ka shpallur në kërkim shtetasin F. S., 30 vjeç, i cili dyshohet se ka kryer marrëdhënie seksuale me të miturën. Njëkohësisht, janë referuar në Prokurori materialet për nisjen e ndjekjes penale ndaj dy të miturve, të dyshuar për të njëjtën vepër të rëndë penale.

“Specialistët për Hetimin e Krimeve të Komisariatit të Policisë Fier shpallën në kërkim shtetasin F. S., 30 vjeç, si dhe referuan materialet në Prokurori, ku nisi procedimi penal për dy 15-vjeçarë”, thuhet në njoftimin zyrtar.

Ngjarja ngre alarmin për një tjetër akt të tmerrshëm dhune ndaj të miturve në Shqipëri, në një kohë kur rastet e abuzimeve seksuale po shtohen dhe shoqëria është e pafuqishme të mbrojë më të pambrojturit.

Materialet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier, ndërsa forcat e rendit janë në kërkim të autorit kryesor.