Detaje nga zhdukja e gruas në Tropojë/ Telefoni i saj gjendet në makinën e bashkëshortit, 58-vjeçari nën hetim

Zbardhen detaje të reja nga zhdukja e 48-vjeçares nga Tropoja, e cila ka humbur kontaktet me familjen që prej datës 22 korrik. Familjarët e saj kanë bërë menjëherë kallëzim në polici, duke ngritur alarmin për humbjen e saj.

Policia e Kukësit nisi hetimet dhe pas marrjes në pyetje të fëmijëve dhe të afërmve, arrestoi bashkëshortin e saj, 58-vjeçarin Imer Shpata. Ky i fundit rezulton me precedent penal, pasi vetëm një vit më parë kishte vuajtur 8 muaj burg për dhunë ndaj bashkëshortes. Në banesën e tij u gjetën dhe u sekuestruan dy armë zjarri.

Hetimet paraprake tregojnë se zhdukja e gruas mund të ketë lidhje me dhunën sistematike në familje. Shpata, në dëshminë e tij, ka deklaruar se nuk ka dijeni për vendndodhjen e gruas dhe se e kishte lënë në shtëpi më 22 korrik. Fëmijët kanë folur për herë të fundit me të ëmën atë natë rreth orës 22:00.

Por ajo që e ka përforcuar më tej dyshimin ndaj 58-vjeçarit, është gjetja e telefonit të gruas së zhdukur brenda në makinën e tij. I pyetur për këtë, Shpata ka pretenduar se nuk e di si ka përfunduar telefoni atje.

Mëngjesin e 23 korrikut, ai është larguar drejt Durrësit për të qëndruar tek e motra, por lëvizja e tij po hetohet intensivisht. Policia ka sekuestruar pamjet e kamerave të sigurisë përgjatë itinerarit Tropojë–Durrës dhe po punon për të rindërtuar lëvizjet e tij, pasi dyshimet për përfshirjen e tij në zhdukjen e 48-vjeçares janë të forta. Hetimet janë ende në vijim.