Detaje nga vrasja e 52-vjeçares në Pogradec/ Zbulohet emri i autorit të dyshuar, dyshohet për lidhje intime me viktimën

Ngjarja e rëndë që tronditi Pogradecin më 27 korrik, ku 52-vjeçarja Kozeta Teço humbi jetën në një zjarr që përfshiu banesën e saj në lagjen nr. 1, po merr përmasa të reja. Hetimet paraprake çojnë drejt pistës së një vrasjeje të qëllimshme, të mbuluar nga zjarrvënie për të fshehur provat.

Drejtoria Vendore e Policisë Korçë ngriti një grup të posaçëm hetimor në bashkëpunim me Prokurorinë, i cili ka kryer veprime të shumta hetimore dhe eksperimentale në vendngjarje. Nga analiza e të dhënave të mbledhura dhe provave materiale, u zbulua se zjarri në banesën e viktimës nuk ka qenë aksidental, por i qëllimshëm, i shkaktuar nga një person konkret.

Burime nga grupi hetimor kanë konfirmuar se personi i shoqëruar dhe i dyshuar si autor i zjarrvënies është Ilirjan Selmani, banues në periferi të Pogradecit. Ai është parë teksa shoqërohej nga policia për eksperimente hetimore në vendin e ngjarjes.

Sipas hetuesve, Selmani dyshohet se ka pasur një lidhje intime me viktimën, çka hedh një pistë të re hetimi, ndryshe nga ajo e konfliktit për çështje pronësie që u përmend fillimisht. Ky detaj pritet të luajë një rol kyç në zbardhjen e motivit të vërtetë të ngjarjes.

Kujtojmë se fillimisht dyshohej për asfiksi nga tymi, por pas ekzaminimeve mjeko-ligjore, u hapën dyshimet se Kozeta Teço është vrarë më parë dhe më pas banesa është përfshirë nga flakët për të fshehur gjurmët e krimit.

Hetimet vijojnë, ndërsa pritet që autoritetet të dalin me konkluzionet përfundimtare sapo procesi hetimor të mbyllet.