E vrau dhe dogji banesën për të fshehur krimin, autori i dyshuar shoqërohet në vendin e ngjarjes

Policia ka shoqëruar autorin e dyshuar për vrasjen e 52-vjeçares Kozeta Teço në Pogradec, ndërsa sot është zhvilluar eksperimenti hetimor në vendin e krimit. Pamjet tregojnë momentin kur ai është marrë nga efektivët dhe çuar në apartamentin ku ndodhi ngjarja e rëndë.

Fillimisht u dyshua se gruaja kishte humbur jetën si pasojë e asfiksisë nga zjarri që kishte përfshirë banesën, por pas ekzaminimit të trupit u zbuluan shenja dhune, duke përforcuar pistën e vrasjes me dashje.

Hetimet paraprake tregojnë se autori mund ta ketë vrarë viktimën dhe më pas t’i ketë vënë zjarr banesës për të zhdukur provat. Pista kryesore e hetimit lidhet me një konflikt për pronën.

Ngjarja ka ndodhur në orët e para të mëngjesit të sotëm, kur fqinjët e Teços njoftuan zjarrfikësen pas tymit që dilte nga banesa. Ajo u gjet pa shenja jete mes flakëve.

Në vendin e ngjarjes janë sekuestruar kamerat e sigurisë të dy objekteve pranë pallatit, ndërsa disa persona janë shoqëruar në komisariat për të dhënë dëshmi.

Hetimet po vijojnë për të zbardhur plotësisht rrethanat dhe motivin e vrasjes.