Arrestohet 64-vjeçari, i dyshuar për zjarrvënie në Frakull të Vogël të Fierit

Një 64-vjeçar nga Frakull i Vogël, Fier, është arrestuar nga policia nën dyshimin për zjarrvënie. Sipas hetimeve të kryera menjëherë pas njoftimit për një vatër zjarri, Nazmi Kapaj dyshohet se ka ndezur flakët në tokën e tij për djegien e mbeturinave, por zjarri është përhapur dhe ka shkaktuar dëme serioze.

Si pasojë e flakëve, janë djegur 225 rrënjë ulliri në pronësi të një shtetasi tjetër. Policia ka arrestuar 64-vjeçarin dhe ka referuar materialet procedurale në Prokurorinë e Fierit për veprime të mëtejshme ligjore.

Ngjarja vjen në një periudhë kur masat kundër zjarreve në natyrë janë forcuar, për shkak të rrezikut të lartë që përbëjnë për pronat dhe mjedisin. Autoritetet bëjnë apel për kujdes maksimal dhe respekt të ligjit në menaxhimin e zjarrëvënieve.