Arrestohet 26-vjeçari në Vlorë, theu arrestin shtëpiak, përndiqte dhe nxiste të miturin të përdorte drogë

Një 26-vjeçar është arrestuar në Vlorë pasi theu masën e sigurisë “arrest në shtëpi” dhe u kap në flagrancë jashtë banesës. Sipas policisë, i riu dyshohet se përndiqte një të mitur 12-vjeçar dhe e nxiste për të përdorur substanca narkotike.

Ngjarja ndodhi në qytetin bregdetar, ku specialistët për Hetimin e Krimeve në Komisariatin e Policisë Vlorë arrestuan shtetasin H. M., banues në Vlorë, për tre vepra penale: “Nxitja për përdorimin e drogës”, “Largimi i të burgosurit nga vendi i qëndrimit” dhe “Përndjekja”.

Ai ishte vendosur në “arrest shtëpie” nga Gjykata e Shkallës së Parë të Juridiksionit të Përgjithshëm Vlorë për çështjen e përndjekjes. Por pavarësisht kësaj mase, u konstatua jashtë banesës, duke thyer vendimin gjyqësor dhe duke vijuar veprimet e dyshuara kriminale ndaj të miturit.

Materialet procedurale janë referuar tashmë në Prokurorinë e Vlorës për veprime të mëtejshme.