Dëshmia e të mbijetuarës amerikane nga aksidenti tragjik në autostradë: Brenda pak sekondash u përmbysëm

Një aksident i rëndë ka ndodhur në autostradën Durrës-Tiranë, ku një autobus i linjës Berat-Tiranë është përmbysur në rrugë, ndërsa shoferi humbi jetën.

Një turiste amerikane, e cila ishte pasagjere e autobusit, ka folur për mediat duke treguar se si ndodhi aksidenti.

“Jam Debora nga Amerika. Isha në Shqipëri për qejf, u kënaqa shumë. Nesër do të kthehem në Amerikë dhe sot po vija në Tiranë. Rrugës pashë shoferin që bënte lëvizje, rrotullohej, nuk ishte mirë. Po shkruaja në telefon kur autobusi u përmbys.

Ata që ishin ulur në anën e majtë të mjetit morën dëmtime shumë të rënda. Shoferin e pashë që vdiq. Dëmtime të rënda mori edhe djali i ulur pas tij dhe një vajzë. Unë isha ulur në anën e djathtë. Nuk u lëndova. Shumë njerëz nga ndërtesat afër dhe shoferë ndaluan të na ndihmonin”, u shpreh ajo.

Në aksident mbetën të plagosur 12 persona, shtatë prej të cilëve ndodhen në gjendje të rëndë.