Bonusi për pensionistët, reagon Kryeministri Edi Rama: Pasqyrë kuptimplotë e një vendi ku ekonomia rritet

Edi Rama ka komentuar miratimin në mbledhjen e qeverisë të aktit normativ për rishikimin e buxhetit të shtetit, duke e cilësuar atë si një pasqyrë të rritjes ekonomike dhe të mundësive të reja financiare për kategoritë në nevojë.

Sipas kryeministrit, akti normativ i qershorit parashikon një bonus të ri për pensionistët, si dhe rritje të mbështetjes për personat me aftësi të kufizuara, fëmijët me nevoja të veçanta dhe kujdestarët e tyre.

Ai theksoi gjithashtu se paketa përfshin masa mbështetëse në fusha të ndryshme si teknologjia, sipërmarrja, shëndetësia, bujqësia dhe zhvillimi urban e rural, ndërsa veçoi financimin e mbrojtjes si më të madhin në historinë e Forcave të Armatosura.

Rama deklaroi se në ditët në vijim do të shpjegohen në detaje secila nga masat e reja, duke nënvizuar se të ardhurat shtesë nga rritja e çmimit të naftës do të orientohen gjithashtu drejt bonusit për pensionistët.

“AKTI NORMATIV I QERSHORIT që sapo kaloi në qeveri është pasqyrë kuptimplotë e një vendi ku ekonomia rritet dhe mundëson një tjetër bonus për pensionistët;

një rritje kuptimplotë të mbështetjes për personat me aftësi të kufizuar, fëmijët me aftësi të veçanta, autizëm, etj., si edhe kujdestarët e tyre;

një sërë masash të tjera mbështetëse për teknologjinë, sipërmarrjen, shëndetësinë, bujqësinë, zhvillimin urban e rural, ku masa e re për financimin e mbrojtjes është më madhja ndonjëherë në historinë e Forcave të Armatosura

Në ditët në vijim do të shpjegojmë çdonjërën nga masat, por mbetet domethënëse kalimi tek bonusi i pensionistëve edhe i të gjithë të ardhurave shtesë nga rritja e çmimit të naftës”,– shkruan Rama.