Wall Street në rënie, Dow Jones humbet mbi 1% mes rritjes së çmimit të naftës dhe frikës nga inflacioni

Bursat amerikane e mbyllën seancën e së premtes në rënie, nën presionin e rritjes së çmimit të naftës dhe shqetësimeve për inflacionin, pak ditë përpara mbledhjes së Rezervës Federale amerikane (Fed).

Indeksi Dow Jones ra me 1,23%, duke humbur 653 pikë dhe duke zbritur në 52.215 pikë. S&P 500 u ul me 0,52%, në 7.623 pikë, ndërsa Nasdaq humbi 0,21%, duke e mbyllur seancën në 25.955 pikë.

Në bilancin javor, S&P 500 dhe Nasdaq shënuan përkatësisht rënie prej 0,3% dhe 0,5%, ndërsa Dow Jones e mbylli javën me një rritje prej 0,5%.

Faktori kryesor që ushtroi presion mbi tregjet ishte rritja e çmimit të naftës. Nafta Brent kaloi përkohësisht 117 dollarë për fuçi, ndërsa nafta amerikane WTI kapërceu 103 dollarët.

Rritja e çmimeve të energjisë ka shtuar frikën për një valë të re inflacioni, në një kohë kur investitorët presin sinjale nga Fed për drejtimin e ardhshëm të politikës monetare. Pavarësisht shqetësimeve, tregjet nuk presin që banka qendrore amerikane të rrisë sërish normat e interesit në mbledhjen e javës së ardhshme.

Megjithatë, investitorët mbeten të shqetësuar për ndikimin e konfliktit me Iranin në tregjet e energjisë, si dhe për kostot e larta të investimeve në inteligjencën artificiale.

Në tregun e obligacioneve, yield-i i bonove 10-vjeçare amerikane u rrit në 4,994%, ndërsa ai i bonove 30-vjeçare arriti në 5,325%.

Në sektorin teknologjik, aksionet e kompanive të gjysmëpërçuesve, mes tyre Micron Technology dhe AMD, shënuan rikuperim pas humbjeve të mëparshme. Në të kundërt, aksionet e kompanive të shitjes me pakicë me çmime të ulëta, si Dollar Tree, Dollar General dhe Five Below, u vunë nën presion për shkak të shqetësimeve mbi ndikimin e karburanteve të shtrenjta.

Aksionet e American Express ranë me më shumë se 3%, pasi kompania njoftoi se do të shkurtojë 5% të fuqisë punëtore në nivel global, në përpjekje për të ulur kostot operative. Rënia e saj, së bashku me atë të Caterpillar dhe Goldman Sachs, ndikoi në ecurinë negative të Dow Jones.

Edhe aksionet e Apple u ulën, pavarësisht kërkesës së lartë për telefonin e ri të palosshëm iPhone Duo, çmimi fillestar i të cilit është rreth 2.000 dollarë.

Ndërkohë, aksionet e kompanisë farmaceutike Bristol Myers Squibb u vunë nën presion pas njoftimit për vdekjen e një pjesëmarrësi në provat klinike të një trajtimi eksperimental me qeliza për sëmundjet autoimune, duke ngritur pikëpyetje mbi sigurinë e kësaj kategorie terapish.