TIA: Asnjë fluturim shtesë nga Tel Avivi drejt Tiranës, operimet vijojnë sipas skeduli

Tiranë, tetor 2026 – Aeroporti Ndërkombëtar i Tiranës (TIA) sqaron se fluturimet nga dhe drejt Tel Avivit vijojnë sipas programit të planifikuar, pa shtim apo reduktim të frekuencave.

Dy fluturimet e ditës së sotme janë pjesë e programit veror, i cili zgjat deri në fund të muajit tetor. Përgjatë këtij sezoni, tri linja ajrore operojnë me 22–24 fluturime në javë.

Ndërsa për sezonin dimëror 2026–2027, kompania ajrore EL AL ka planifikuar fluturime me një frekuencë prej dy herësh në javë. Gjithashtu, këto linja ajrore bashkëpunojnë me operatorë turistikë, të cilët prej disa kohësh sjellin turistë në Shqipëri.

Ndërkohë, problemet teknike në sistemet e kontrollit të trafikut ajror në Itali kanë sjellë anulimin e disa fluturimeve nga dhe drejt Tiranës, duke prekur linjat me Milanon (Malpensa), Torinon, Veronën, Pizën, Riminin dhe Gjenovën. TIA po koordinon situatën me kompanitë ajrore dhe autoritetet përkatëse.

Për informacion të përditësuar mbi oraret dhe statusin e fluturimeve, pasagjerët ftohen të konsultojnë faqen zyrtare të Aeroportit Ndërkombëtar të Tiranës, www.tirana-airport.com, si dhe kanalet zyrtare të kompanive ajrore.