Më i miri i Euro 2020 zbarkon në Paris, PSG "blindon" portën me futbollistin italian

Gigio Donnarumma është zyrtarisht lojtar i PSG-së. Klubi francez ka prezantuar afrimin e portierit italian me një video të postuar në Twitter, aty ku shkruhet në italisht: mirë se vjen Gigio. 

Një përforcim fantastik për ekipin e Mauricio Pochettinos, teksa PSG siguron me parametra zero një nga portierët më të mirë dhe “blindon” kuadratin për shumë vite.

22-vjeçari, i cili ka luajtur me Milanin deri tani dhe pak ditë më parë fitoi Euro 2020 me Italinë, madje duke u shpallur lojtari më i mirë i turneut, ka firmosur një kontratë 5-vjeçare me klubin e ri.