Moti i paqëndrueshëm vijon në Elbasan, pas përmbytjeve të djeshme në Librazhd

Situata e vështirë e krijuar një ditë më parë në territorin e Bashkisë së Librazhdit — ku reshjet intensive shkaktuan përmbytje, bllokime rrugësh dhe vështirësi në qarkullim — ka vijuar edhe gjatë mesditës së sotme në të gjithë Qarkun e Elbasanit.

Prej tre ditësh me radhë, pothuajse të gjitha bashkitë e qarkut po përfshihen çdo pasdite nga rrebeshe shiu, të shoqëruara me stuhi dhe shkarkesa të forta elektrike. Reshjet kanë qenë të herëpashershme, por në disa zona kanë arritur intensitet të lartë, duke krijuar vështirësi në lëvizje dhe shqetësim mes banorëve.

Pasditen e sotme, shiu i rrëmbyer ka përfshirë qytetin e Elbasanit dhe zonat përreth, ndërsa në disa segmente rrugore është raportuar ulje e dukshmërisë dhe vështirësi në qarkullimin e automjeteve. Situata është paraqitur veçanërisht problematike përgjatë aksit Elbasan–Peqin, ku reshjet e dendura kanë detyruar shoferët të ulin shpejtësinë dhe të rrisin kujdesin.

Policia Rrugore i ka bërë thirrje drejtuesve të mjeteve të respektojnë rregullat e qarkullimit, të mbajnë distancën e sigurisë dhe të shmangin manovrat e rrezikshme, pasi lagështia e rrugëve dhe intensiteti i reshjeve rrisin rrezikun e aksidenteve.

Ndërkohë, autoritetet lokale vazhdojnë të monitorojnë nga afër situatën, sidomos në zonat e prekura një ditë më parë nga përmbytjet dhe rrëshqitjet e materialeve inerte. Në Librazhd, ku stuhia e djeshme shkaktoi dëme të shumta në infrastrukturë dhe bllokoi përkohësisht disa akse rrugore, strukturat e emergjencave civile mbeten në gatishmëri për çdo zhvillim të mëtejshëm.