Mjekët tregojnë se çfarë duhet të kemi kujdes gjatë ditëve të nxehta në plazh

Valët e të nxehtit po godasin vendin dhe temperaturat e larta po sjellin një shtim të ndjeshëm të rasteve të urgjencës mjekësore, sidomos me goditje nga dielli dhe dehidratim.

Në këtë situatë, mjekët paralajmërojnë se grupet më të rrezikuara janë fëmijët, të moshuarit dhe personat me sëmundje kronike, të cilët duhet të jenë të kujdesshëm dhe të marrin masa parandaluese për të shmangur komplikacionet serioze.

Mjekja Bonjaku thekson disa masa thelbësore për pushuesit në plazh, ku ekspozimi i gjatë ndaj rrezeve të diellit mund të shkaktojë djegie të rënda të lëkurës, dehidratim dhe madje edhe humbje të vetëdijes. Ajo këshillon që të përdoren kremra mbrojtës me faktor të lartë, të mbahet kapele apo çadër, dhe të vishen rroba të lehta që mbrojnë nga dielli.

Gjithashtu, mjekët nxisin pirjen e vazhdueshme të ujit dhe shmangien e alkoolit apo pijesh me kafeinë, të cilat dehidratojnë organizmin. Është e rëndësishme që pushuesit të bëjnë pushime të shkurtra në hije dhe të shmangin aktivitetet fizike të rënda gjatë orëve më të nxehta të ditës, zakonisht nga ora 11:00 deri në 17:00.

Në raste të para të simptomave si marramendje, të vjella, lodhje ekstreme apo dhimbje koke, duhet kërkuar menjëherë ndihmë mjekësore. Parandalimi dhe kujdesi janë mënyrat më të mira për të shmangur pasojat serioze të nxehtësisë dhe për të ruajtur shëndetin gjatë valës së fortë të të nxehtit.