Zjarr në Bërzhitë të Tiranës, helikopterët nisin ndërhyrjen nga ajri

Një zjarr masiv ka përfshirë sot zonën e Bërzhitës në Tiranë, duke djegur shkurre dhe pemë në një sipërfaqe të konsiderueshme. Forcat zjarrfikëse kanë shkuar menjëherë në vendngjarje për të frenuar përhapjen e flakëve, ndërsa për të përballuar situatën e rënduar, është aktivizuar edhe ndërhyrja nga ajri me helikopterë.

Situata e zjarreve në Shqipëri mbetet alarmante. Deri në orën 13:00 të ditës së sotme, autoritetet kanë evidentuar 26 vatra zjarri në të gjithë vendin, prej të cilave 17 janë ende aktive dhe po monitorohen nga forcat e emergjencës.

Vatrat janë përhapur në zona malore, pyjore dhe kullota, ku terreni i vështirë dhe era po komplikojnë punën e zjarrfikësve dhe forcave të tjera të angazhuara.

Përpjekjet intensive nga toka dhe ajri synojnë të frenojnë përhapjen e zjarreve, duke mbrojtur banesat dhe komunitetet në rrezik. Autoritetet paralajmërojnë qytetarët për kujdes të shtuar dhe ndihmë në raportimin e çdo vatre të re zjarri për të minimizuar dëmet.

Gjendja mbetet në monitorim të vazhdueshëm ndërsa flakët vazhdojnë të luftohen nga të gjitha strukturat përgjegjëse.