Bebe Rexha emocionohet në emisionin amerikan/ Surprizohet live nga prindërit dhe kunata (VIDEO)

Këngëtarja shqiptare me famë ndërkombëtare, Bebe Rexha, ka qenë e ftuar në emisionin e njohur amerikan të mëngjesit “Today”, ku ka performuar disa nga këngët e saj në kuadër të serisë së koncerteve Citi Concert Series në Manhattan, New York.

Artistja 36-vjeçare ka folur gjatë intervistës edhe për albumin e saj më të fundit, “Dirty Blonde”, të publikuar në qershor. Megjithatë, momenti më emocionues i paraqitjes së saj erdhi gjatë intervistës, kur Bebe u surprizua nga familjarët e saj.

Në ekran u shfaqën babai i saj, Flamur Rexha, nëna Bukurije Rexha dhe kunata Dorina, të cilët po e ndiqnin paraqitjen e këngëtares.

Surpriza e emocionoi dukshëm Bebe Rexhën, e cila iu drejtua familjarëve me fjalë të përzemërta. “Ju dukeni kaq bukur, kaq të mrekullueshëm! Babai im ka qenë duke qarë gjatë gjithë kohës”, tha ajo.

Momenti i veçantë solli emocione në studio dhe tregoi edhe një herë lidhjen e ngushtë të këngëtares me familjen e saj, ndërsa Bebe Rexha vijoi më pas me performancën e saj në emision.