“Uji i Tiranës i dëmshëm”, reagon Meta: Ndërmarrja e Ujësjellësit ka rrezikuar jetën e qytetarëve

Gjykata Administrative e Tiranës pranoi ditën e djeshme, se cilësia e ujit që furnizohet kryeqytetit është jashtë parametrave që garantojnë cilësinë e konsumimit.

Me anën e një vendimi të paprecedentë Gjykata ngarkoi shoqërinë civile në ‘mbikëqyrje’ të shoqërisë shtetërore Ujësjellës Kanalizime Tiranë, në lidhje me masat që do të ndërmarren në përmirësimin e cilësisë së ujit.

Në lidhje me këtë vendim ka reaguar dhe presidenti i vendit Ilir Meta, i cili ka përshëndetur aktivizimin e shoqërisë civile në mbrojtje të shëndetit të qytetarëve dhe thekson se papërgjegjshmëria dhe keqfunksionimi i Ndërmarrjes së Ujësjellësit Tiranë ka rrezikuar jetën e kryeqytetasve.

Postimi i Ilir Metës në facebook: Qytetarët e Tiranës meritojnë mbrojtje të garantuar të shëndetit përmes shërbimeve shtetërore, që mbahen dhe paguhen me taksat e tyre.

E përshëndes aktivizimin e shoqërisë civile në këtë rast për mbrojtjen e shëndetit të qytetarëve nga papërgjegjshmëria dhe keqfunksionimi i Ndërmarrjes së Ujësjellësit të Tiranës, në varësi të Bashkisë, që siç faktohet nga të dhënat e bëra publike, ka rrezikuar jetën e tyre duke i furnizuar me ujë të papërdorshëm sipas parametrave.

Tashmë, që pritet arsyetimi i vendimit të Gjykatës së Shkallës së Parë, çështja duhet të ndiqet edhe në instancat më të larta shtetërore, ndërkohë të dhënat e bëra publike, duhet të vënë në lëvizje Prokurorinë për të hetuar deri ku arrin shkalla e përgjegjësisë dhe e shkeljes së ligjit, për të nxjerrë para drejtësisë këdo, që ka vendosur në rrezik masiv shëndetin e banorëve të kryeqytetit.

Mbrojtja e shëndetit dhe e jetës së qytetarëve të Tiranës dhe të gjithë Shqipërisë, veçanërisht në këtë periudhë pandemie, duhet të jetë prioritet absolut.