KAS përfundon rinumërimin e 114 kutive në Berat, LSI nuk e merr mandatin e deputetit

Komisioni i Ankimimeve dhe Sanksioneve (KAS) ka përfunduar rinumërimin e votave për 114 kuti të qarkut të Beratit.

Pas rinumërimit të votave LSI u rrit me 15 vota ndërsa PS u ul me 18 vota. Në total forca e drejtuar nga Monika Kryemadhi ngushtoi diferencën në 58 vota me PS-në, por që janë të pamjaftueshme për ti dhënë mandatin e deputetit.

Kujtojmë që LSI kishte listuar dy kërkesa kryesore për Beratin:Shpalljen e pavlefshme të votimeve në nivel qarku dhe përsëritje të zgjedhjeve.

Avokati i LSI në KAS Altin Kaziaj kërkoi hapjen dhe numërimin e kutive në të gjitha QV-të e Beratit, ndërsa përfaqësuesi i PS Salianji dha “OK”-in vetëm për hapjen e kutive të pretenduara në kërkesën ankimore.

Në total qarku i Beratit ka 277 qendra dhe kuti votimi, ku u vendos hapja dhe rinumërimi për 114 prej tyre.