Altin Dumani thotë troç pengun e tij: A do të vijë koha që unë të lëviz lirshëm si çdo qytetar?

Kryeprokurori Altin Dumani e ka mbyllur intervistën me gazetarin Alban Dudushi duke treguar edhe pengun e tij më të madh.

Duke u nisur nga kufizimi që ky post i ka sjellë në jetën private ai tha se shpesh herë mendon nëse do të vijë dita që edhe ai do mund të lëviz lirshëm si çdo qytetar.

"Veten patjetër e kam kufizuar dhe sakrifikuar, por nga ana tjetër edhe familja ime po sakrifikon. Është e kufizuar në jetën e saj, lirinë e saj. Dhe familjet e prokurorëve janë të kufizuar në lirinë e tyre.

Kur shkoj nga shtëpia për në punë në mëngjes, se natën kthehem vonë e nuk shoh gjë, nga dritarja e automjetit shoh njerëzit që lëvizin lirshëm, mua më vjen pyetja a do të vijë ajo kohë që unë, familja ime, kolegët e mi dhe familjet e saj të lëvizin lirshëm?

Përgjigjja ime është që unë pavarësisht përgjegjësive është një punë që kemi zgjedhur ta bëjmë e do ta bëjmë me përkushtim. Dua të falenderoj familjen që më duron e më mbështet pavarësisht kostove që kanë marrë përsipër", tha Dumani.