Pensionisti në protestë: Do marr dyshekun të shtrihem me studentët, politikanët janë...

Një qytetar në moshë pensioni ka tërhequr vëmendjen në protestën e studentëve, e cila ka hyrë në ditën e saj të shtatë. I revoltuar me situatën politike dhe ekonomike në vend, i moshuari nuk i ka kursyer kritikat e ashpra ndaj qeverisë, deputetëve dhe vetë brezit të tij.

Gjatë fjalës së tij, ai denoncoi rritjen qesharake të pensioneve me vetëm 2700 lekë në muaj, duke e cilësuar këtë si një tallje me shtresën më vulnerabël të shoqërisë. Ai madje fajësoi vetë pensionistët që vazhdojnë të votojnë këtë klasë politike, duke theksuar se po vuajnë pasojat e zgjedhjeve të tyre dhe duke e quajtur veten e bashkëmoshatarët e tij "brryla" për votëbesimin e dhënë.

Kritikat nuk u ndalën vetëm te pensionet. Qytetari e krahasoi parlamentin me një grumbull "zapatash" të mbledhur nga rrethet ose barakat, ndërsa theksoi obsesionin e qeverisë me ndërtimin e kullave. Sipas tij, këto ndërtime dhe titujt "investitor strategjik" shërbejnë vetëm për njerëz që nuk paguajnë taksa, ndërsa populli i thjeshtë varfërohet dita-ditës.

Në shenjë mbështetjeje absolute për të rinjtë që po protestojnë, pensionisti u bëri thirrje studentëve që të mos tërhiqen dhe të kalojnë natën në shesh. Për të treguar solidaritetin e tij, ai premtoi se do të marrë një dyshek dhe do t'i bashkohet atyre për të fjetur në rrugë, duke dhënë një mesazh të fortë rezistence për të gjithë qytetarët.