Mister në Selanik, 80-vjeçarja gjendet e pajetë në banesë, arrestohet bashkëshorti 90-vjeçar

Një ngjarje e rëndë është regjistruar në Selanik të Greqisë, ku një grua 80-vjeçare është gjetur e pajetë në banesën e saj në zonën e Chalastra-s. Për ngjarjen është arrestuar bashkëshorti i saj 90-vjeçar, ndërsa policia po heton rrethanat e paqarta të vdekjes.

Trupi i të moshuarës u zbulua të shtunën nga vajza e saj, e cila njoftoi menjëherë shërbimet e urgjencës. Pas mbërritjes në banesë, policia konstatoi se gruaja kishte dëmtime në kokë. Brenda shtëpisë ndodhej edhe bashkëshorti i saj 90-vjeçar, i cili kishte plagë në kokë dhe në dorë.

I moshuari, i cili vuan nga demenca, nuk ka mundur t’u japë hetuesve një shpjegim të qartë për atë që kishte ndodhur, as për vdekjen e bashkëshortes dhe as për plagët që kishte marrë vetë.

Ai është transportuar në spitalin “Papageorgiou”, ku po merr trajtim mjekësor nën mbikëqyrjen e autoriteteve. Me urdhër të prokurorit është bërë arrestimi i tij, ndërsa hetimet vijojnë për të zbardhur ngjarjen.

 Policia po mbledh prova nga banesa dhe nuk përjashton as mundësinë që në shtëpi të ketë hyrë një person i tretë. Deri më tani, rrethanat e sakta të vdekjes së 80-vjeçares mbeten të paqarta.