Mbi 2 miliardë dollarë nga arabët, akuzat e rënda ndaj Jared Kushnerit! Dhëndrit të Trumpit, për lidhje sekrete dhe....

Një hetim gjashtëvjeçar ngre pretendime të rënda për Jared Kushnerin, dhëndrin e Donald Trumpit dhe ish-këshilltarin e tij duke pretenduar se shërbimet sekrete ruse monitoronin telefonin e tij, ndërsa udhëheqësit e Arabisë Saudite dhe Emirateve të Bashkuara Arabe i kishin vënë në dispozicion shuma që arrinin të paktën 2 miliardë dollarë.

Hetimi është pjesë e librit Princes and Thieves: Jared Kushner and Mohamed bin Zayed’s Secret Plot to Remake the Middle East, një pjesë e të cilit u publikua paraprakisht nga revista amerikane Vanity Fair. Sipas autorit çështja ngre pikëpyetje serioze mbi sigurinë kombëtare amerikane, interesat financiare dhe ndikimin e udhëheqësve të huaj në politikën e jashtme të Uashingtonit.

Ngjarjet e përshkruara në hetim nisin në vitin 2017, gjatë mandatit të parë presidencial të Trumpit kur Kushneri ishte një nga këshilltarët e tij kryesorë dhe angazhohej në përpjekjet për normalizimin e marrëdhënieve mes Izraelit dhe vendeve arabe. Ky proces çoi në nënshkrimin e Marrëveshjeve të Abrahamit në vitin 2020, ku Emiratet e Bashkuara Arabe dhe Izraeli vendosën marrëdhënie diplomatike.

Princi saudit Mohammed bin Salman dhe presidenti i Emirateve Mohamed bin Zayed, kërkonin një kanal të privilegjuar komunikimi me Trumpin ndërsa Kushneri synonte të siguronte përparim në negociatat diplomatike. Hetimi pretendon se interesat e tyre u ndërthurën përmes propozimeve financiare dhe llogarive bankare me shuma të mëdha parash.

Fillimisht, sipas artikullit dy udhëheqësit e Gjirit i propozuan Kushnerit krijimin e një fondi prej 10 miliardë dollarësh për financimin e politikës së jashtme amerikane, përfshirë edhe ndërtimin e murit në kufirin me Meksikën. Ky propozim nuk u realizua por më pas sipas hetimit u krijuan dy llogari bankare me më shumë se dy miliardë dollarë gjithsej.

Llogaria e parë, e financuar nga të dy udhëheqësit, ndodhej në një bankë në Abu Dhabi. Ajo ishte në emër të vëllait të Mohamed bin Zayedit, por, sipas Cole, administrohej bashkërisht me Kushnerin, i cili kishte të drejtën e nënshkrimit. Llogaria pretendohet se përdorej për qëllime diplomatike.

Llogaria e dytë, e financuar nga Mohamed bin Zayed, sipas hetimit ishte menduar për përdorim privat të Kushnerit dhe mbahej në Bankën Qendrore të Izraelit. Artikulli pretendon se kryeministri izraelit Benjamin Netanyahu duhej të informohej përpara çdo transaksioni.

Një tjetër aspekt i çështjes lidhet me pretendimet për përgjimin e telefonit të Kushnerit nga shërbimet ruse të inteligjencës. Sipas rindërtimit të gazetarit, informacionet dolën në dritë në vitin 2020, pas një operacioni të përbashkët të shërbimeve sekrete britanike dhe holandeze, të cilat ndaluan një spiun rus në Londër.

Hetimi pretendon se, pas këtij operacioni, agjentët arritën të mësonin metodën që përdorej për monitorimin e telefonit të Kushnerit dhe e përdorën atë për të parë aktivitetin në iPhone-in e tij, përfshirë edhe transaksionet bankare. Më pas, informacionet thuhet se iu përcollën gazetarit investigativ.

Nëse këto pretendime do të konfirmoheshin, çështja do të ngrinte shqetësime të rëndësishme për sigurinë e komunikimeve të zyrtarëve amerikanë, transparencën financiare dhe mundësinë e konflikteve të interesit gjatë negociatave diplomatike.

Pas publikimit të pjesës paraprake të hetimit nga Vanity Fair, Kushneri i ka mohuar akuzat, duke i cilësuar ato si «krejtësisht të pabazuara».

Megjithatë, pretendimet e publikuara kërkojnë verifikim të pavarur përmes dokumenteve financiare dhe provave të tjera. Deri atëherë, ato duhet të trajtohen si pretendime të një hetimi gazetaresk dhe jo si fakte të provuara./Corriere Della Sera