LVV dhe LDK i rikthehen tryezës së diskutimeve, Kosova kërkon marrëveshje për institucionet e reja

Pas javësh pezullim, Lëvizja Vetëvendosje dhe Lidhja Demokratike e Kosovës janë gati të rikthejnë bisedimet për krijimin e institucioneve të reja të Kosovës. Të dyja partitë kanë hapur rrugën për një marrëveshje, ndërsa vendi afrohet me seancën konstituive të Kuvendit më 6 gusht.

Negociatat mes dy forcave politike u ndërprenë pas vendimit të kryetarit të LDK-së, Lumir Abdixhiku, për t’i pezulluar ato në një moment kur përballej me një votëbesim brenda partisë.

Abdixhiku arriti të sigurojë mbështetjen e nevojshme dhe vazhdon drejtimin e LDK-së, duke hequr pengesën për vazhdimin e dialogut me LVV-në.

LVV, partia e kryeministrit në detyrë Albin Kurti, doli fituese e zgjedhjeve, por për krijimin e institucioneve të plota i nevojitet një partner politik. Një nga çështjet kryesore mbetet zgjedhja e presidentit të ri, proces që kërkon një shumicë të mjaftueshme në Kuvend dhe që mund të shmangë një tjetër krizë politike apo zgjedhje të parakohshme.

Ushtruesja e detyrës së presidentit, Albulena Haxhiu, zhvilloi takime me përfaqësuesit e partive parlamentare për përgatitjen e seancës së konstituimit të Kuvendit.

Sipas saj, vazhdimi i takimeve politike është i rëndësishëm për krijimin e institucioneve të reja.

Nga LVV-ja, deputetja Arbërie Nagavci bëri të ditur se partia pret rifillimin e bisedimeve me LDK-në dhe arritjen e një marrëveshjeje që do t’i hapë rrugë funksionimit të institucioneve.

Nga ana tjetër, Abdixhiku ka bërë të ditur se pezullimi i dialogut është hequr dhe se LDK është e gatshme të vijojë diskutimet aty ku janë ndërprerë.

Megjithatë, deri tani nuk ka një marrëveshje konkrete mes dy palëve. LVV ka mohuar raportimet për një dakordësi paraprake, duke sqaruar se takimi i parë mes Kurtit dhe Abdixhikut ishte vetëm një hap fillestar drejt një mundësie bashkëpunimi.

Me afrimin e seancës së Kuvendit, presioni për një zgjidhje politike në Kosovë po rritet, ndërsa alternativa e zgjedhjeve të reja mbetet ende në skenar nëse palët nuk arrijnë një marrëveshje.