Ekzekutimi i boksierit Besar Nimani, prokuroria gjermane: “Killeri” u largua me motor pas vrasjes

Boksieri shqiptar, Besar Nimani, u ekzekutua me 8 plumba mbrëmjen e së shtunës në Gjermani, në qytetin e Bielefeld. Ishin familjarët e Nimanit që njoftuan vdekjen e boksierit pasi u qëllua me armë zjarri teksa po dilte nga një restorant i qytetit.

Policia dhe prokuroria gjermane kanë dalë më njoftim ku sqarojnë disa detaje nga ngjarja tragjike në qytetin e Bielefeld.

Sipas njoftimit të policisë dhe prokurorisë gjermane:

“Të shtunën në mbrëmje, 9 mars 2024, një 38-vjeçar nga Bielefeld vdiq si pasojë e të shtënave në qendër të qytetit. Autori ose autorët janë në arrati.”

Tutje, në njoftim thuhet se sipas gjetjeve aktuale, viktima ndodhej në zonën e Obernstrasse Klasingstrasse rreth orës 18:00 kur një ose më shumë autorë janë afruar dhe kanë qëlluar me armë zjarri për vdekje.

“Një operacion i madh policor është duke u zhvilluar aktualisht në zonën e qytetit Bielefeld. Vijon kërkimi për autorin ose autorët të cilët raportohet se kishin ikur nga vendi i ngjarjes me një motor (skuter). Hetimet po kryhen nga skuadra e vrasjeve “Ober” në krye me kryedetektivin Alexander Scholz.”, – thuhet në njoftim.

Policia thekson se boksieri nga Kosova, Besar Nimani vdiq në vend për shkak të plagëve të rënda.

E vranë sapo doli nga restoranti, si boksieri shqiptar Besar Nimani i shpëtoi atentatit në vitin 2013

Të tjera detaje kanë dalë lidhur me vrasjen e boksierit shqiptar, Besar Nimani, i cili u ekzekutua këtë të shtunë në Gjermani, në qytetin e Bielefeld.

Siç raportohet nga mediet gjermane të bazuara në deklaratat e dëshmitarëve, 38-vjeçari shqiptar u qëllua me armë teksa po dilte nga një restorant i qytetit. Sipas ‘BILD’, Nimani vdiq në vend. Autoritetet gjermane nuk kanë bërë ende asnjë arrestim, ndërsa janë në ndjekje të autorëve.

Nimani në vitin 2013 ka rënë pre e një sulmi të ngjashëm me armë zjarri.

Besar Nimani ka qenë një boksier i kategorisë “Super Welterweight” dhe në 27 ndeshje numëron 26 fitore dhe vetëm 1 humbje.

Ai u tërhoq përfundimisht nga boksi në vitin 2019. Kujtojmë se ishin fillimisht familjarët e Nimanit ata që njoftuan vdekjen e boksierit.