Cardi B zbulon dëshirën për një tjetër operacion estetik, reperja: Gjoksi im ka nevojë për rregullim!

Reperja e njohur amerikane Cardi B po mendon t’i nënshtrohet një tjetër ndërhyrjeje estetike në gjoks, pasi ka vënë re ndryshime në pamjen e tij pas lindjes së katër fëmijëve. Megjithatë, pavarësisht dëshirës për të përmirësuar pamjen, artistja pranon se ka frikë nga operacioni dhe ende nuk e ka marrë një vendim përfundimtar.

Gjatë një bisede në platformën X Spaces, Cardi B tregoi se prej kohësh po mendon të bëjë një ndërhyrje të re, por se ideja e operacionit e bën të ndihet e pasigurt.

'Dua të rregulloj më në fund gjoksin tim. Nuk do të gënjej, kam shumë frikë nga ky operacion. Nuk e di pse, sepse nuk kam frikë nga ndërhyrjet e tjera. Por gjoksin dua ta rregulloj”, u shpreh reperja.

Ajo shpjegoi se shtatzënitë dhe lindja e katër fëmijëve kanë ndikuar në pamjen e gjoksit të saj. Me një gjuhë të drejtpërdrejtë dhe me humor, Cardi B e përshkroi ndryshimin si të konsiderueshëm, duke treguar se nuk është më e kënaqur me pamjen aktuale.

Artistja theksoi se nuk dëshiron të ndryshojë madhësinë e gjoksit, por vetëm të përmirësojë formën dhe pamjen e tij. Megjithatë, ajo sqaroi se, ndonëse e ka përmendur shpesh këtë dëshirë, ende nuk është e sigurt nëse do ta realizojë ndërhyrjen.

Cardi B ka treguar edhe më parë se iu nënshtrua zmadhimit të gjoksit në moshën 18-vjeçare. Në një intervistë për revistën Interview, në vitin 2021, gjatë një bisede me këngëtaren Mariah Carey, ajo foli hapur për pasiguritë që kishte për trupin e saj në adoleshencë.

Reperja tregoi se, kur ishte më e re, ndihej e pasigurt për shkak të komenteve që merrte për pamjen e saj fizike. Ajo shpjegoi se në Bronx, ku u rrit, format e theksuara të trupit vlerësoheshin shumë dhe se komentet për gjoksin e saj e kishin bërë të ndihej keq.

Kur mbushi 18 vjeç dhe nisi të punonte si kërcimtare, Cardi B arriti të siguronte paratë për të paguar ndërhyrjen estetike. Sipas saj, vendimi lidhej me dëshirën për të kapërcyer pasiguritë që kishte për trupin e saj.

Tashmë, pas rreth 18 vitesh, reperja po shqyrton mundësinë e një ndërhyrjeje tjetër, por këtë herë pranon se frika nga operacioni e bën të hezitojë. Për momentin, mbetet e paqartë nëse ajo do të vendosë ta realizojë dëshirën e saj.