Trump njofton pezullimin njëmujor të tarifave ndaj Meksikës!

Presidenti i SHBA-së, Donald Trump ka thënë se Meksikës nuk do t'i kërkohet të paguajë tarifa për mallrat që janë nën marrëveshjen tregtare midis dy vendeve dhe Kanadasë deri më 2 prill.

Trump nuk e ka konfirmuar nëse pezullimi vlen edhe për Kanadanë, por fqinji i saj verior pret një përjashtim të të njëjtës natyrë, tha një burim i qeverisë kanadeze për BBC.

Sekretari i Tregtisë Howard Lutnick i tha CNBC më herët se përjashtimi i përkohshëm i tarifave për importet e pjesëve të makinave nga Kanadaja dhe Meksika mund të shtrihet në të gjitha produktet që janë pjesë e Marrëveshjes Shtetet e Bashkuara-Meksikë-Kanada (USMCA).

USMCA u krijua gjatë mandatit të parë të Trump. 34 kapitujt e saj përfshinin makinat, bulmetin dhe lëndën drusore, ndër të tjera si shërbimet financiare, dhe marrëveshja përfshinte një rishikim çdo gjashtë vjet.

"Pasi fola me Presidenten Claudia Sheinbaum të Meksikës, unë kam rënë dakord që Meksikës nuk do t'i kërkohet të paguajë tarifa për çdo gjë që bie nën Marrëveshjen USMCA," tha Trump.

Sheinbaum tha se kishte një telefonatë të shkëlqyer dhe respektuese me Trump, duke shtuar se të dy vendet do të punojnë së bashku për të frenuar rrjedhën e fentanilit opioid nga Meksika në SHBA dhe për të frenuar trafikimin e armëve në drejtim të kundërt. Një përjashtim për Kanadanë pritet të shpallet më vonë, pavarësisht se Trump sulmoi kryeministrin kanadez Justin Trudeau në mediat sociale më herët të enjten duke thënë se ai ka bërë një punë të tmerrshme për Kanadanë.

USMCA hyri në fuqi në vitin 2020 pas vitesh negociatash dhe rishikimesh. Ishte një rinovim i Marrëveshjes së Tregtisë së Lirë të Amerikës së Veriut, e cila u krijua në 1994.  Mallrat me vlerë miliarda kalojnë çdo ditë kufijtë e SHBA-së, Kanadasë dhe Meksikës dhe ekonomitë e tyre janë thellësisht të integruara. Futja e tarifave ka ndezur një luftë tregtare midis SHBA-së, fqinjëve të saj dhe gjithashtu Kinës.

Trump ka argumentuar se vendosja e tarifave do të mbrojë industrinë amerikane dhe do të nxisë prodhimin. Megjithatë, shumë ekonomistë paralajmërojnë se tarifat mund të çojnë në rritje të çmimeve për konsumatorët në SHBA. Tarifat paguhen nga biznesi që importon një produkt ose pjesë. Shumë biznese amerikane kanë ngritur shqetësime rreth tarifave nga dy partnerët më të afërt tregtarë të Amerikës, duke pasur parasysh zinxhirët e integruar të furnizimit.

Në përgjigje të tarifave fillestare prej 25% të Trump, Kanadaja dhe Meksika njoftuan gjithashtu tarifa hakmarrëse për importin.