Berisha: Rama në komë politike, sajon pyetjet “sy për sy”!

Kreu i PD Sali Berisha në një deklaratë për mediat tha se kryeministri i vendit ende nuk ka treguar një program para shqiptarëve.

Rikthimin e Sekretarit të Përgjithshëm të Kryeministrisë, Ëngjëll Agaçit, në jetën publike, lideri opozitar e sheh me dyshime, ku sërish pohoi se nuk është i bindur që ka qenë i sëmurë.

“Njeriu në komë politikë, nuk duhet të kemi asnjë lloj vëmendje për të. Fakti që nuk guxon të paraqesë një program para shqiptarëve, dëshmon se Edi Rama është e shkuara e këtij vendi.

Nga verifikimi i fakteve, në 1400 komente, nuk ekzistonte as pyetja, as emri i atij që Edi Rama pretendonte se e ka pyetur. Dhe unë do i kërkoj zyrës së shtypit të bëjë një njoftim për këtë se ky përbën mashtrim publik. A mundet unë t’i përgjigjem një mashtruesi publik?

Në rast se ai është operuar, unë kam koment si për çdo të sëmurë: shërim të plotë. Në rast se ai për llogari të vetes dhe Edi Ramës ka bërë të sëmurin imagjinar, atëherë ai është i pashpresë. Kaq i them!”, tha Berisha.