Trump, i izoluar, dërgon 6,000 trupa në Lindjen e Mesme për ta shtyrë Teheranin drejt negociatave të reja në Pakistan

Lufta po bëhet ndërkombëtare. Dhe përfshin Dragoin Kinez. Irani thuhet se ka blerë një satelit spiun kinez që i dha atij mundësinë për të goditur bazat ushtarake amerikane në të gjithë Lindjen e Mesme gjatë luftës së fundit. Kjo është sipas një hetimi nga Financial Times, i cili konsultoi dokumente ushtarake iraniane të rrjedhura që tregojnë se sateliti, i njohur si TEE-01B, u ble nga Forca Hapësinore e Korpusit të Gardës Revolucionare Islamike në fund të vitit 2024, pasi u lëshua në hapësirë ​​nga Kina.

Listat e koordinatave me vula kohore, imazhet satelitore dhe analizat orbitale tregojnë se komandantët ushtarakë iranianë më pas i ngarkuan satelitit të monitoronte vendet kryesore ushtarake amerikane. Imazhet u morën në mars, para dhe pas sulmeve me dronë dhe raketa në ato vende. TEE-01B u ndërtua dhe u lëshua nga Earth Eye Co, një kompani kineze që pretendon se ofron “dorëzimin në orbitë”, një model eksporti pak i njohur ku anijet kozmike të lëshuara në Kinë transferohen te klientët e huaj pasi arrijnë në orbitë. Sipas FT, sateliti ofron rezolucion të lartë, më të mirë se ajo e një pajisjeje që tashmë është në përdorim në arsenalin iranian, Noor-3. Kjo i lejoi inteligjencës të monitoronte vendosjen amerikane, të shënonte çdo ndryshim në qëndrim, të verifikonte pozicionin e automjeteve dhe të rregullonte koordinatat e qitjes. Pasdaranët favorizoheshin gjithashtu nga mungesa e mbrojtjes pasive të Pentagonit. Shumica e bazave nuk kanë bunkerë të përshtatshëm për avionë apo edhe personel: aeroplanët ishin lehtësisht të identifikueshëm në vendet e tyre të uljes.

Sipas zëdhënësit të Ministrisë së Jashtme kineze, Lin Jian, lajmet e mediave që «akuzojnë Kinën se po i jep mbështetje ushtarake Iranit janë tërësisht të fabrikuara». Lin shtoi në X se nëse SHBA do të vazhdojnë me luftën e tyre tregtare kundër Pekinit mbi bazën e këtyre akuzave, «Kina do të përgjigjej me kundërmasa». Ditët e fundit CNN, duke cituar zyrtarë amerikanë, raportonte se “Kina po shqyrton mundësinë për t’i dhënë Iranit raketa të ngjashme me ato që Teherani ka përdorur së fundmi për të rrëzuar një avion luftarak amerikan F-15”. Inteligjenca amerikane nuk ka komentuar. Pas këtij lajmi të CNN, Trump ka kërcënuar me vendosjen e tarifave prej 50% ndaj Kinës, duke shkaktuar një reagim të fortë nga Pekini: “Do të marrim masa të vendosura kundërpërgjigjeje” nëse SHBA vendosin tarifa shtesë, kishte thënë të martën zëdhënësi i Ministrisë së Jashtme kineze.

Për këtë çështje shumë delikate ka ndërhyrë presidenti amerikan. Trump deklaroi – në një intervistë për Fox News – se i kishte dërguar një letër presidentit kinez Xi Jinping, ku i kërkonte shpjegime për lajmet sipas të cilave Kina po i furnizon armë Iranit. Si përgjigje, ai tha se kishte marrë një letër nga Xi në të cilën thuhej se «në thelb» nuk po e bënte këtë. «I shkrova një letër Xi-së. I kërkova të mos furnizonte Iranin me armë. Ai m’u përgjigj me një letër, duke thënë se në thelb nuk po e bën këtë», ka treguar kreu i Shtëpisë së Bardhë për Fox News. “Kina është shumë e lumtur që unë po hap përgjithmonë Ngushticën e Hormuzit. Po e bëj për ta, dhe për botën”, këmbëngul Trump në rrjetin e tij Truth, duke theksuar se presidenti Xi Jinping “do të më japë një përqafim të madh kur të mbërrij pas disa javësh”.

Shtetet e Bashkuara dhe Irani kanë rënë dakord në parim për një takim të ri, por nuk është përcaktuar as data dhe as vendi i takimit. Këtë e raporton Wall Street Journal duke cituar burime, sipas të cilave ndërmjetësit po shtyjnë për një zgjatje të armëpushimit. Një delegacion pakistanez i nivelit të lartë është nisur nga Islamabadi drejt Teheranit për t’i dorëzuar regjimit iranian një mesazh të ri të SHBA-ve për bisedimet e ardhshme, sipas Press TV.

Ndërkohë, Pentagoni do të dërgojë mijëra ushtarë të tjerë në Lindjen e Mesme në ditët në vijim, ndërsa administrata Trump kërkon të ushtrojë presion mbi Iranin për një marrëveshje që t’i japë fund konfliktit. Sipas Washington Post, forcat që po dërgohen përfshijnë rreth 6.000 ushtarë në aeroplanmbajtësen USS George H.W. Bush dhe disa anije luftarake shoqëruese. Rreth 4.200 ushtarë të tjerë pritet të mbërrijnë në fund të muajit.

Sa i përket Trumpit, ai vazhdon me qëndrimin e tij provokues duke ripostuar një foto ku shihet pranë Jezusit, i cili e përqafon ndërsa ai mbështet kokën mbi të. Pas tyre ndodhet një flamur amerikan që shndërrohet në një dritë verbuese. “Të çmendurit e së majtës radikale mund të mos e pëlqejnë, por unë mendoj se është mjaft e bukur!”, shkroi presidenti amerikan në Truth.

Në të njëjtën kohë, edhe JD Vance përdor argumente historike e fetare, duke mbrojtur bombardimet amerikane ndaj Iranit duke iu referuar Luftës së Dytë Botërore dhe kritikave të Papës. Ai tha se Papa gabon kur thotë se dishepujt e Krishtit nuk janë “kurrë në anën e atyre që dikur përdornin shpatën dhe sot hedhin bomba”.

Trump gjithashtu ka kritikuar Evropën, duke e quajtur “të trishtueshme” idenë për hapjen e Ngushticës së Hormuzit pa SHBA-të. Ai ka sulmuar edhe NATO-n, duke vënë në dyshim kontributin amerikan në Aleancë dhe duke thënë se SHBA shpenzojnë shumë para pa marrë mbështetje të mjaftueshme në këmbim.

Në fund, ai ka deklaruar se Italia përfiton shumë naftë nga Ngushtica e Hormuzit, duke kritikuar gjithashtu kryeministren Giorgia Meloni dhe Italinë.