Shumica e amerikanëve mendojnë se lufta kundër Iranit ishte një gabim

Një sondazh i ri i realizuar nga Washington Post, ABC News dhe Ipsos tregon se shumica e amerikanëve e konsiderojnë gabim përdorimin e forcës ushtarake nga SHBA kundër Iranit.

Sipas të dhënave, 60% e të anketuarve mendojnë se ndërhyrja ushtarake ishte një vendim i gabuar. Siç vëren “Washington Post”, këto shifra janë të ngjashme me opinionin publik për Luftën në Irak në vitin 2006, si dhe me qëndrimet e shprehura gjatë Luftës së Vietnamit në fillim të viteve ’70.

Në ndarje politike, kundërshtimi është më i lartë te demokratët, ku rreth 9 në 10 e konsiderojnë veprimin gabim. Po ashtu, 71% e të pavarurve ndajnë të njëjtin mendim, ndërsa vetëm 19% e republikanëve e shohin ndërhyrjen si gabim.

Sa i përket politikës së ardhshme ndaj Iranit, opinioni publik është i ndarë: 48% mbështesin një marrëveshje paqeje edhe nëse ajo nuk është plotësisht e favorshme për SHBA, ndërsa 46% preferojnë presion më të fortë për një marrëveshje më të mirë, edhe nëse kjo rrezikon rikthimin e konfliktit.

Sondazhi prek edhe gjendjen ekonomike në SHBA. Rreth 23% e qytetarëve thonë se po përballen me vështirësi financiare, nga 17% që ishin më herët gjatë vitit. Ndërkohë, 52% raportojnë se po ruajnë standardin e jetesës dhe 24% thonë se po përmirësohen ekonomikisht.

Në lidhje me çmimet e larta të karburanteve, 44% e amerikanëve kanë ulur përdorimin e makinës, 42% kanë reduktuar shpenzimet familjare dhe 34% kanë ndryshuar planet e udhëtimeve. Gjysma e të anketuarve parashikojnë rritje të mëtejshme të çmimeve gjatë vitit të ardhshëm.