Tentoi të vidhte një motomjet, e pëson 20-vjeçari në Vlorë

Një 20-vjeçar ka rënë në prangat e Policisë në Vlorë, i dyshuar për tentativë vjedhjeje të një motomjeti në qytet.

Ngjarja është regjistruar një ditë më parë, rreth mesditës, në lagjen “28 Nëntori”. Sipas policisë, i riu me inicialet V.M. u kap më pas në zonën e “Ujit të Ftohtë”, ku u arrestua në flagrancë nga shërbimet e rendit.

Gjatë kontrollit fizik, atij iu gjet dhe u sekuestrua një përforcues metalik grushti. Policia gjithashtu ka bërë të mundur gjetjen e motomjetit të dyshuar të vjedhur, i cili u sekuestrua në cilësinë e provës materiale.

Materialet i janë referuar Prokurorisë së Vlorës për hetime të mëtejshme, ndërsa ndaj të riut rëndojnë veprat penale “Vjedhja” dhe “Prodhimi, mbajtja, blerja apo shitja pa leje e armëve të ftohta”.