Rrëzohet avioni në një fshat të Gjermanisë, raportohen 3 viktima

Tre persona kanë humbur jetën të hënën si pasojë e rrëzimit të një avioni të vogël në landin Nordrhein-Westfalen të Gjermanisë.

Bëhet fjalë për një avion të tipit Cessna 172, i cili ishte nisur gjatë paradites nga zona në veri të Utrechtit, në Holandë.

Pasi hyri në hapësirën ajrore gjermane, avioni u rrëzua rreth orës 11:20 pranë fshatit Gerderath, në afërsi të qytetit Erkelenz.

Sipas raportimeve të mediave gjermane, avioni me katër ulëse përfundoi në një fushë dhe u dëmtua rëndë, duke u shkatërruar pothuajse tërësisht nga përplasja.

Policia gjermane konfirmoi se në avion ndodheshin tre persona. Të gjithë humbën jetën në vendngjarje.

Autoritetet nuk kanë bërë ende të ditur identitetet e viktimave. Ndërkohë, ekipet hetimore kanë nisur punën për të zbardhur shkaqet dhe rrethanat që çuan në rrëzimin e avionit. Hetimet për ngjarjen janë ende në vazhdim.