Përmbyset varka me dhjetëra emigrantë nga Afrika, mbyten 38 prej tyre

38 emigrantë që vinin nga Briri i Afrikës raportohet se janë mbytur pasi varka e tyre u përmbys pranë Jemenit, thanë të hënën një zyrtar lokal dhe dëshmitarë.

Hadi Al-Khurma, drejtori i qarkut Rudum, i tha Reuters se anija u mbyt para se të arrinte në brigjet e provincës Shabwa, në lindje të Adenit.

“Peshkatarët dhe banorët arritën të shpëtojnë 78 nga emigrantët, të cilët raportuan se rreth 100 të tjerë që ishin me ta në të njëjtën varkë janë zhdukur. Kërkimi është ende në vazhdim dhe Kombet e Bashkuara janë informuar për incidentin,” tha ai.

Sipas Kombeve të Bashkuara, 97,000 emigrantë mbërritën në Jemen nga Briri i Afrikës vitin e kaluar.