OKB kritikon ndihmat ajrore në Gaza: Të kushtueshme dhe joefektive

Organizata e Kombeve të Bashkuara ka reaguar ashpër ndaj formës së shpërndarjes së ndihmave humanitare në Gaza përmes ajrit, duke e cilësuar si “më të kushtueshmen dhe më pak efektiven” në përballimin e krizës aktuale. Sipas OKB-së, kjo mënyrë ndihme është thjesht një “shpërqendrim nga mosveprimi” i qeverisë izraelite për të siguruar ndihma në mënyrë të qëndrueshme dhe me ndikim real në terren.

Deklarata vjen në një kohë kur Izraeli ka lejuar shpërndarjen ajrore të ndihmave, në një përpjekje për të zbutur kritikat ndërkombëtare, ndërsa paralajmërimet për një uri të përhapur në Rripin e Gazës po bëhen gjithnjë e më alarmante.

Programi Botëror për Ushqim (WFP), një nga agjencitë humanitare të OKB-së, ka bërë të ditur se situata është përkeqësuar në mënyrë dramatike. Sipas raportit të tyre, një e treta e popullsisë në Gaza nuk ka konsumuar asnjë ushqim për ditë të tëra, duke përshkruar gjendjen si “nivele të reja dhe befasuese të dëshpërimit”.

OKB nënvizon se përkundër pamjeve të ndihmave që hidhen nga ajri, këto metoda kanë ndikim minimal në krahasim me nevojat reale në terren dhe konsumojnë resurse të konsiderueshme financiare. Prandaj, organizatat ndërkombëtare kërkojnë kthimin në metodat tradicionale të shpërndarjes, si transporti tokësor përmes korridoreve të sigurisë, që konsiderohen shumë më të efektshme në menaxhimin e krizave humanitare.