"Mungesë globale e punonjësve mjekësorë deri në vitin 2030", OBSH ngre alarmin 

Organizata Botërore e Shëndetësisë (OBSH) paralajmëroi sot se bota do të përballet me mungesë të stafit mjekësor deri në vitin 2030, me një të katërtën e mjekëve që do të dalin në pension në 10 vitet e ardhshme.

“Në shumë vende, si popullsia ashtu edhe punonjësit e shëndetësisë po plaken në të njëjtën kohë. Kjo mund ta përkeqësojë më tej mungesën globale të parashikuar prej 11.1 milionë punonjësish të shëndetësisë deri në vitin 2030”, tha OBSH-ja në një deklaratë, duke cituar të dhëna nga më shumë se 100 vende në raport, raporton Reuters.

OBSH-ja deklaron se deri në vitin 2030, vlerësohet se 67 vende do të kenë staf të pamjaftueshëm për të ruajtur standardet aktuale të trajtimit mjekësor.

Për të ruajtur shpërndarjen aktuale të personelit mjekësor në raport me popullsinë, nevojiten 832,000 punonjës shëndetësorë shtesë.

Vendet me të ardhura më të larta, përfshirë shumë në Evropë, do të goditen më rëndë sepse kanë një përqindje më të lartë të punonjësve të moshuar shëndetësorë, dhe në këto vende një në tre mjekë do të dalin në pension në 10 vitet e ardhshme.