Ferri nën tokë në Meksikë/ Zbulohen 32 trupa të pajetë në një varr sekret, gjysma e tyre të identifikuar

Autoritetet në Meksikë kanë zbuluar 32 trupa të pajetë në një varr sekret në komunën e Irapuato, ndërsa gati gjysma e tyre janë identifikuar deri më tani.

Sipas Zyrës së Prokurorit të shtetit Guanajuato, trupat u gjetën në varre të fshehta në komunitetin La Calera, në pjesën veriore të Irapuatos, rreth 320 kilometra në veriperëndim të kryeqytetit, Qytetit të Meksikës. Ekipet mjeko-ligjore punojnë në vend prej datës 30 korrik, ndërsa identifikimi i trupave të mbetur vazhdon.

Ky zbulim vjen pak më shumë se dy muaj pas një masakre me të shtënat në një festë rruge në Irapuato, ngjarje që la të vrarë 12 persona.

Shteti i Guanajuatos është përfshirë në një valë të dhune të vazhdueshme vitet e fundit, ndërsa përplasjet midis Kartelit të Gjeneratës së Re Jalisco dhe grupit rival Santa Rosa de Lima për kontrollin e territorit kanë shkaktuar përplasje të rënda.

Nga janari deri në korrik 2025, në këtë shtet janë regjistruar më shumë se 1,500 vrasje. Grupi i krimit të organizuar përdor shpesh varre të fshehta për të fshehur viktimat e tyre, ndërsa numri i të zhdukurve në Meksikë arrin pranë 132,000 personave.