Erdogan thirrje Albin Kurtit: Rishikojeni vendosjen e ambasadës në Jerusalem

Presidenti i Turqisë, Recep Tayyip Erdogan i ka dërguar një letër kryeministrit të Kosovës, Albin Kurti, duke e uruar për detyrën e re. Në letër, Erdogan i ka bërë një thirrje për çështjen e Ambasadës së Kosovës në Jerusalem, që sipas Erdogan, Kurti duhet ta rishikojë.

 “Nga ana tjetër, pasi që e di se edhe ju keni gjithashtu shqetësime në lidhje me çështjen e Ambasadës së Kosovës, hapja e së cilës është njoftuar se është bërë në Jerusalem, mendoj se do të ishte e dobishme për qeverinë tuaj të rishikonte këtë çështje brenda kornizës së rezolutave përkatëse të OKB-së dhe të drejtës ndërkombëtare”, thuhet në letër.

Gjithashtu, Erdogan ka vlerësuar edhe përfshirje e Partisë Demokratike Turke të Kosovës në qeverinë e Kosovës, duke e konsideruar tregues vëmendje dhe prioriteti ndaj Turqisë. Kujtojmë se kjo është hera e dytë që Erdogan i bën këtë kërkesë Albin Kurtit, pasi një të tillë ia adresoi edhe para hapjes së ambasadës së Kosovës në Jerusalem.

Ndërkohë, Turqia reagoi ashpër pas hapjes së ambasadës, duke e konsideruar atë një hap të papërgjegjshëm dhe të paligjshëm. Hapja e Ambasadës në Jerusalem ishte pjesë e marrëveshjes së katër shtatorit që u arrit në SHBA mes Kosovës dhe Serbisë.