Dubai merr fronin, krijon pishinën më të thellë në botë

Pishina më e thellë në botë ndodhet në Dubai. Me 60 metra thellësi, pishina rrëmben kështu vendin e parë, duke lënë pas pishinën “Deepspot” të ndërtuar në Poloni, që është 45 metra e thellë. Një tjetër pishinë pritet të ndërtohet së shpejti në Angli, por ajo do të duhet të kënaqet me vendin e dytë, pasi do të jetë vetëm 50 metra e thellë.

Pishina e Dubait është e mbushur me 14 milionë litra ujë, volumi i nevojshëm për të mbushur 6 pishina olimpike dhe është të paktën 4 herë më e madhe sesa çdo pishinë tjetër në botë. Zyrtarisht, pishina mori titullin e më të thellës në botë nga Libri i Rekordeve Guinness, më 27 qershor.

Pishina do të hapet për publikun më vonë gjatë këtij viti, por ndër të parët që e ka provuar është Princi i Kurorës, Sheikh Hamdan bin Mohammed bin Rashid Al Maktoum, i pasionuar pas zhytjeve ekstreme.