Detaje nga shpërthim në rafinerinë e naftës në Itali, 2 të vdekur, 3 të zhdukur, 9 të plagosur

Ka shkuar në dy bilanci i të vdekurve nga shpërthimi në rafinerinë e kompanisë energjetike Eni në qytetin Calenzano, pranë Firences, ndërsa nëntë persona janë plagosur dhe tre të zhdukur, ka bërë të ditur guvernatori i Toskanës, Eugenio Gianni.

Ai ka shtuar se zjarri në rafineri është shuar, shkruan Ansa. Shërbimet zjarrfikëse, mjekësore dhe policore janë në vendngjarje, autostrada aty pranë është e mbyllur, ndërsa qarkullimi hekurudhor është ndalur, raporton “Corriere Fiorentino”.

Shpërthimi ka ndodhur në pjesën e rafinerisë ku depozitat janë mbushur me karburant, por cisternat nuk janë përfshirë nga flakët.

“Hetimi është në vazhdim. I bëjmë thirrje popullatës që të mos afrohet në zonën e prekur”, njoftoi bashkia e Calenzanos në rrjetet sociale.

Për shkak të intensitetit të lartë, shpërthimi është ndjerë edhe në vende të afërta, si dhe janë thyer xhamat e objekteve aty pranë, ndërsa në disa shtëpi janë shembur çatitë. Hetimet për shkaqet e shpërthimit janë duke vazhduar.