Bastisje kundër drogës në Meksikë, humbin jetën dy zyrtarë të ambasadës amerikane, dyshohet lidhje me CIA-n

Një aksident tragjik në shtetin Chihuahua të Meksikës u ka marrë jetën katër zyrtarëve, mes tyre dy punonjës të ambasadës amerikane, të cilët sipas mediave të huaja dyshohet se kishin lidhje me aktivitete të CIA-s.

Së bashku me ta humbën jetën edhe dy zyrtarë meksikanë, ndërsa autoritetet kanë nisur hetimet për të zbardhur shkaqet e ngjarjes.

Sipas të dhënave paraprake, automjeti me të cilin udhëtonin doli nga rruga, përfundoi në një përrua dhe më pas shpërtheu, duke shkaktuar vdekjen e menjëhershme të katër personave.

Viktimat po ktheheshin nga një takim me autoritetet meksikane në kuadër të një operacioni kundër një laboratori droge në një zonë të thellë.

Presidentja e Meksikës, Claudia Sheinbaum, ka deklaruar se do të verifikohet nëse përfshirja e mundshme e palës amerikane në këtë operacion ka respektuar ligjet e sigurisë kombëtare. Ndërkohë, Prokurori i Përgjithshëm i Chihuahua-s ka sqaruar se zyrtarët amerikanë nuk kanë qenë të përfshirë drejtpërdrejt në aksionin kundër laboratorit të drogës.