Avioni përfshihet nga flakët gjatë fluturimit, ulje emergjente në Torino

Një ngjarje dramatike ka ndodhur mëngjesin e djeshëm mbi hapësirën ajrore të Italisë, kur një avion i pasagjerëve me destinacion Lyon-in, është përfshirë nga flakët dhe është detyruar të bëjë ulje emergjente në aeroportin “Sandro Pertini” të Torinos.

Sipas mediave italiane, avioni tip Airbus A320, i cili ishte nisur nga Dubrovniku rreth orës 10:00, pësoi një defekt teknik serioz gjatë fluturimit. Rreth orës 10:28, një nga motorët e tij shpërtheu në flakë, duke alarmuar ekuipazhin dhe detyruar pilotin të aktivizojë menjëherë procedurat e emergjencës.

Falë ndërhyrjes së shpejtë të kontrollit të trafikut ajror dhe profesionalizmit të pilotit, avioni arriti të ulet me sukses në Torino, duke shpëtuar jetën e të gjithë pasagjerëve dhe ekuipazhit.

Sipas “Corriere della Sera”, askush nuk është lënduar gjatë incidentit, ndërsa pas uljes, avioni u rrethua menjëherë nga zjarrfikësit dhe ekipet e emergjencës, të cilët siguruan stabilitetin e situatës.

Për shkak të ngjarjes, aktiviteti në aeroportin e Torinos u pezullua për rreth një orë, ndërsa pasagjerët që po udhëtonin drejt Francës u evakuuan me siguri dhe u transferuan me autobusë drejt destinacionit të tyre përfundimtar, Lyon.