‘Akuzat për grusht shteti’, ish-presidenti Obama i përgjigjet Donald Trump: Pretendime skandaloze

Barack Obama ka thyer heshtjen përballë akuzave agresive të Donald Trump, duke hedhur poshtë kategorikisht pretendimet e pasardhësit të tij se ai u përpoq të bënte një “grusht shteti” duke fabrikuar prova për ndërhyrjen ruse në zgjedhjet presidenciale të vitit 2016.

Siç raportohet nga Guardian, zyra e ish-presidentit bëri një deklaratë të rrallë publike, duke i përshkruar pretendimet e Trump si “qesharake” dhe një “përpjekje për shpërqendrim”, pas deklaratave të presidentit aktual se Obama ishte kreu i një “bande” që komplotoi “tradhti” kundër tij.

“Nga respekti për zyrën e presidencës, zyra jonë zakonisht nuk i përgjigjet dezinformatave të vazhdueshme që vijnë nga Shtëpia e Bardhë. Megjithatë, deklaratat aktuale janë aq skandaloze sa kërkojnë një përgjigje”, thuhej në deklaratë.

“Këto akuza janë qesharake dhe një përpjekje e dobët për të shkëputur vëmendjen nga realiteti".

Përgjigja e Obamës erdhi menjëherë pas publikimit të një dokumenti 11-faqësh nga Tulsi Gabbard, Drejtoreshë e Inteligjencës Kombëtare, e cila pretendonte se kishte prova për një “komplot tradhtar” nga zyrtarët e administratës Obama dhe ia kishte dërguar atë Departamentit të Drejtësisë.

“Asgjë në dokumentin e publikuar javën e kaluar nuk e hedh poshtë përfundimin e pranuar gjerësisht se Rusia u përpoq të ndikonte në zgjedhjet e vitit 2016, por dështoi të manipulonte votat”, tha zyra e Obamës.

Ky zbulim u konfirmua si nga raporti i Këshilltarit Special Robert Mueller në vitin 2019 ashtu edhe nga raporti i Komitetit të Inteligjencës së Senatit në vitin 2020, i kryesuar nga Marco Rubio — i cili aktualisht është Sekretar i Shtetit në administratën Trump.