Zyrtari i lartë amerikan në zyrën e Ilir Prodës: Mbështesim Policinë e Shtetit në punën e saj

Arrestimi i Ilir Metës duket se ka vënë në lëvizje gjithë partnerët ndërkombëtarë, teksa së fundmi në zyrën e Ilir Prodës ka mbërritur Jonathan Ellis. Shefi i Zyrës Rajonale të Sigurimit të SHBA-ve ka mbështetur punën e Policisë së Shtetit duke dhënë notë pozitive.

Paçka se ka pasur shumë Kritika për operacionin e fundit të uniformave blu ku u arrestua Ilir Meta, ndërkombëtarët kanë mbështetur drejtësinë dhe policinë në luftën kundër krimit të organizuar dhe korrupsionit.

“Partnerë të besueshëm në luftën e përbashkët ndaj krimit të organizuar dhe terrorizmit.

Drejtori i Përgjithshëm i Policisë së Shtetit Drejtues Madhor Ilir Proda priti në zyrë në një takim Shefin e Zyrës Rajonale të Sigurimit në Detyrë në Ambasadën Amerikane në Tiranë, Jonathan Ellis.

Proda dhe Ellis vlerësuan bashkëpunimin e deritanishëm dhe konfirmuan gatishmërinë për ta thelluar këtë bashkëpunim.

Ellis uroi Drejtor Prodën për detyrën e vështirë që ka marrë përsipër dhe e siguroi për mbështetjen e SHBA-së për Policinë e Shtetit dhe se   bashkëpunimi i shkëlqyer dhe i veçantë i Policisë së Shtetit me Zyrën e Sigurimit Rajonal do të thellohet akoma më tej.

Drejtor Proda e siguroi Shefin e Zyrës Rajonale të Sigurimit në Ambasadën Amerikane se është i vendosur për të bashkëpunuar dhe punuar bashkërisht me agjencitë ligjzbatuese amerikane dhe ato në Ambasadën amerikane në Tiranë, duke treguar profesionalizëm e besueshmëri gjatë hetimeve dhe operacioneve të përbashkëta në luftë kundër korrupsionit, krimit të organizuar, trafiqeve të paligjshme dhe terrorizmit”, shkruhej në njoftimin e Policisë së Shtetit.