Zjarri kërcënon banesat në Kalasë të Delvinës, policia nis evakuimin e banorëve

Në fshatin Kalasë, Njësia Administrative Vergo, zjarri që dyshohet të ketë nisur nga zona e Sasaj ka përparuar me shpejtësi drejt fshatit, duke vënë në rrezik banesat aty pranë. Për të parandaluar përhapjen e flakëve, në ndihmë të banorëve dhe zjarrfikësve ka ardhur edhe një helikopter.

Banorët e një lagjeje prej rreth 20 shtëpive janë evakuuar nga shtëpitë e tyre për sigurinë personale. Forcat e policisë po asistojnë në largimin e të moshuarve dhe fëmijëve për të shmangur çdo rrezik për jetën e tyre.

Aktualisht, në Kalasë janë vetëm dy zjarrfikëse nga Delvina, që po punojnë në terren. Situata mbetet e tensionuar edhe në dy vatra zjarri të tjera në Kokotraf dhe Plakoti të Markatit. Banorët dhe zjarrfikësit po përpiqen të shuajnë flakët me pompa uji dhe me ndihmën e forcave në terren, por gjendja mbetet serioze.