Vidhte celularë e para në stacione dhe biznese, kapet në Tiranë 47-vjeçari me precedent penal

Finalizohet operacioni policor i koduar “Tracking” në Tiranë, ku është vënë në pranga një 47-vjeçar i specializuar në vjedhje të portofolave, celularëve dhe shumave të parave, kryesisht në stacionet e autobusëve dhe në biznese të ndryshme të kryeqytetit.

Në pranga ka rënë shtetasi S. G., banues në Tiranë, i dënuar më parë për vjedhje, ndërsa gjatë hetimeve janë dokumentuar 5 raste konkrete të kësaj veprimtarie kriminale, të kryera gjatë muajve të fundit.

Nga kontrollet janë sekuestruar 600 000 lekë, 8200 euro dhe një portofol i vjedhur.

Operacioni u zhvillua nga shërbimet e Komisariateve të Policisë Nr. 2 dhe Nr. 6, të cilët vepruan në bazë të disa kallëzimeve të qytetarëve. Hetimet zbuluan se S. G. iu afrohej qytetarëve në stacionet e transportit publik dhe në dyqane të ndryshme, duke iu marrë sendet personale në mënyrë të fshehtë.

Në kuadër të këtij operacioni, u procedua edhe shtetasi Sh. P., 51 vjeç, pasi në dyqanin e tij u gjet një telefon i vjedhur nga 47-vjeçari.

Policia po vijon hetimet për të zbardhur edhe raste të tjera ku dyshohet se është përfshirë i arrestuari. Materialet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprime të mëtejshme.