Zbardhen detajet nga sherri në "Qytet Studenti", autori e goditi me thikë pasi 20-vjeçari i ngacmoi të motrën

Një tjetër ngjarje e rëndë tronditi mesditën e kësaj të enjte kryeqytetin, Tiranën. Pas ngjarjes së ndodhur të hënën, ku Martin Cani u qëllua me thikë për vdekje jashtë ambienteve të shkollës “Fan Noli”, një tjetër plagosje me thikë ndodhi mes dy të rinjve pranë Universitin privat “Metropolitan”, në zonën “Qytet Studenti”.

19-vjeçari Ajdin Ajvazi  ka qëlluar me thikë 20-vjeçarin Aron Demiraj. Dyshohet se konflikti ka nisur për motive të dobëta.Burime për Newsbomb.al bëjnë me dije se sherri dyshohet se ka nisur pasi Aron Demiraj ka ngacmuar motrën e autorit të plagosjes, Ajdin Ajvazi.

Janë studentët e Universitetit që kanë treguar se 20-vjeçari ka hedhur fjalë drej motrës së Ajvazit, dhe për këtë ky i fundit ka filluar të konfliktohet verbalisht deri në përdorimin e thikës.

Aron Demiraj u dërgua me urgjencë në spitalin e Traumës, ndërsa babi i tij më herët ka folur ku ka treguar se gjendja shëndetësore e të birit është e mirë dhe se nuk kishte faj.

"Tiranë/Informacion paraprak

- Më datë 21.11.2024, në Qytet Studenti, në rrugën "Sotir Kolea", gjatë një konflikti dyshohet se shtetasi A. A., 19 vjeç, ka goditur me mjet të mprehtë shtetasin A. D., 20 vjeç, i cili si pasojë është dëmtuar dhe ndodhet në spital, në kujdesin e mjekëve. Po punohet për sqarimin e rrethanave të ngjarjes", njoftoi policia.